Праз прарыў на водаправодзе некаторым мінчукам пакуль не рэкамендуецца піць ваду з-пад крана, гатаваць на ёй ежу ці мыцца. Санстанцыя са спасылкай на «Мінскводаканал» удакладняе, якія вуліцы закранутыя аварыяй і па якіх адрасах прывозяць аўтацыстэрны з пітной вадой.
Паводле звестак УП «Мінскводаканал» на 16.00, праз аварыю няякасная вада з кранаў можа цячы ў дамах па вуліцах Сурганава, Някрасава, Бяды, Усходняя, Я. Коласа, Валгаградская, К. Чорнага, Філімонава, Высоцкага, Агінскага, Баграціёна, Солтыса, Карвата, Сувязістаў і праспекце Незалежнасці (ад вул. Гікалы да вул. Філімонава).
«Па іншых адрасах Першамайскага, Партызанскага і Савецкага раёнаў змянення якасці вады не назіраецца. Аўтацыстэрны з пітной вадой перамяшчаюцца па адрасах, у залежнасці ад зваротаў ва УП „Мінскводаканал“», — гаворыцца ў паведамленні.
Нагадаем, увечары 6 верасня ў раёне парку Чалюскінцаў прарвала трубу метровага дыяметра з халоднай вадой. Гэта прывяло да перабояў з водазабяспечаннем у Партызанскім, Першамайскім і Савецкім раёнах сталіцы. Ноччу ўжо 7 верасня падачу вады аднавілі па абводных лініях, але медыкі рэкамендавалі пакуль яе не выкарыстоўваць, а для пітва, гатавання і мыцця браць падвозную або бутыляваную ваду.
Падвоз вады «Мінскводаканалам» арганізаваны па наступных адрасах:
- Лагойскі тракт, 8,
- вул. Фрунзе, 3
- вул. Авангардная, 42,
- вул. Макаёнка, 17,
- вул. Каліноўскага, 34,
- вул. Ф. Скарыны, 7,
- вул. Навуковая, 4,
- вул. Сувязістаў, 7,
- вул. Карвата, 76,
- вул. Солтыса, 60,
- вул. Валгаградская, 19Б.