Сёння, 25 студзеня, новым міністрам аховы здароўя стаў Аляксандр Хаджаеў. Ад яго Лукашэнка запатрабаваў пазбавіцца кланавасці ў медыцыне. Цікава, што бацька новаага міністра раней сам працаваў на топавай пасадзе ў Міністэрстве аховы здароўя, а цяпер робіць бізнес у Расіі. Расказваем, што вядома.
Лукашэнка падчас прызначэння Аляксандра Хаджаева 25 студзеня назваў яго «пазакланавым» чалавекам:
«Ведаю, што вы чалавек пазакланавы. Хоць у Мінздароўя ў нас там і сямейныя дынастыі так званыя, і кланы, і іншае. Чаго толькі не хапае… Гэтага быць не мусіць. Я вельмі разлічваю, што вы пакладзяце канец гэтаму. <…> А то ў нас некаторыя збеглыя на Захадзе сядзяць, а тут сваячкі і іншыя чыняць тое, што чынілі раней. Толькі цішком. Мы гэта бачым і прымаем меры процідзеяння. Таму падыходзіць трэба з гэтай ідэяй да прызначэння кадраў, фармавання складу міністэрства і далейшых дзеянняў. Гэта ў вас станоўчая якасць, што вы — чалавек у гэтым плане свабодны ад усялякіх асобаў і ціску».
Аляксандру Хаджаеву 44 гады. Ён нарадзіўся ў Лепелі, гэта Віцебская вобласць. У 2004 годзе скончыў Беларускі дзяржаўны медуніверсітэт. Чатыры гады прапрацаваў доктарам-стажорам па спецыяльнасці «Паталагічная анатомія», а таксама доктарам-патолагаанатамам у РНПЦ імя Аляксандрава. Затым тры гады адвучыўся ў аспірантуры Беларускай медыцынскай акадэміі паслядыпломнай адукацыі па спецыяльнасці «Псіхіятрыя». З 2011 да 2018 года быў вядучым лабарантам, асістэнтам, дацэнтам кафедры псіхатэрапіі і медыцынскай псіхалогіі БелМАПА. Паводле звестак BELPOL, Хаджаеў яшчэ паспеў папрацаваць у Мінскай 6-й клінічнай гарадской бальніцы.
У траўні 2021 года стаў дырэктарам РНПЦ псіхічнага здароўя. Праект «Белыя халаты» пісаў пра дрэнныя ўмовы ўтрымання пацыентаў у цэнтры і здзеклівае стаўленне да іх з боку персаналу.
Новы міністр жанаты, мае траіх дзяцей. Жонка — Ала Хаджаева — па адукацыі юрыстка. Працуе ў кампаніі «ЭкспартМегаТранс», якая займаецца грузаперавозкамі.
Бацька новага міністра, Валерый Хаджаеў — таксама медык, займаў кіраўнічую пасаду ў Мінздароўя. Паводле інфармацыі BELPOL, ён працаваў галоўным доктарам Лепельскай цэнтральнай раённай бальніцы, потым узначальваў упраўленне аховы здароўя Віцебскага аблвыканкама. Да 2010 года быў гендырэктарам «Белмедтэхнікі». А потым працаваў першым намеснікам міністра аховы здароўя. Тады яго начальнікам быў Васіль Жарко (узначальваў Мінздароўя з 2006 да 2016 года). У 2011-м Валерыя Хаджаева пасунуў з пасады першага намесніка Дзмітрый Піневіч. Далей нейкі час бацька новага міністра быў супрацоўнікам Адміністрацыі прэзідэнта.
З 2017 года Валерый Хаджаеў — заснавальнік і дырэктар расійскай фармацэўтычнай кампаніі «Пскоў Фарма», якая спецыялізуецца на вытворчасці лекаў супраць анкалагічных захворванняў. На сайце асаблівай эканамічнай зоны «Могліна» кампаніі сказана, што пасля працы ў Мінздароўя Хаджаеў узначальваў расійскую бальніцу ў горадзе Себеж Пскоўскай вобласці.
У 2022 годзе прадпрыемства былога намесніка міністра выключылі з асаблівай эканамічнай зоны «Могліна» ў Пскоўскай вобласці са штрафам 5 мільёнаў расійскіх рублёў (прыкладна 185 тысяч беларускіх рублёў) за парушэнне абавянняаў.
Чытайце таксама
