У адказ на рашэнне Мінска забараніць беларусам за мяжой атрымліваць ці абменьваць пашпарты ў МУС Літвы прапанавалі Сейму краіны разгледзець падаўжэнне тэрміну дзеяння пашпартоў для замежнікаў. Пра гэта заявіў намеснік міністра ўнутраных справаў Літвы Арнольдас Абрамавічус, перадае BNS.
У МУС Літвы прапануюць павялічыць тэрмін дзеяння пашпартоў замежнікаў да трох гадоў.
«Мы гаворым толькі пра людзей, якія бягуць ад рэжыму, мы не гаворым пра кіроўцаў грузавікоў, іншых рабочых. Менавіта тут апазіцыі даецца такая магчымасць — для тых, у каго ёсць дазволы на пражыванне на гуманітарных падставах, я б, напэўна, так выказаўся», — сказаў Абрамавічус.
Беларусы могуць атрымаць у Літве пашпарт замежніка. Гэта дакумент, які сведчыць асобу, а таксама дазваляе выязджаць з Літвы і заязджаць назад. Дакумент выдаецца замежніку, які мае часовы або пастаянны ВНЖ Літоўскай Рэспублікі, а таксама не мае дзейнага пашпарта і магчымасці яго атрымаць з аб’ектыўных прычын. Такі пашпарт выдаецца на тэрмін, які не перавышае тэрміну часовага віду на жыхарства — часцей за ўсё ён выдаецца на год.
Раней дырэктарка Дэпартамента міграцыі Літвы Эвеліна Гудзінскайтэ заявіла, што яе ведамства чакае павелічэння колькасці заявак на выдачу пашпарта замежніка. Паводле яе, калі раней Дэпартамент міграцыі выдаваў некалькі дзясяткаў такіх пашпартоў за год, то цяпер «іх будзе нашмат больш».
Эвеліна Гудзінскайтэ падкрэсліла, што пашпарт замежніка можа быць выдадзены толькі тым беларусам, якія жывуць у Літве і не могуць вярнуцца ў Беларусь з гуманітарных ці палітычных прычын. Таму, паводле яе словаў, Дэпартаменту міграцыі перад выдачай дакументаў неабходна будзе правесці дадатковыя праверкі.
Нагадаем, з 7 верасня афіцыйна набыў моц указ Аляксандра Лукашэнкі, згодна з якім дыпмісіі больш не будуць выдаваць пашпарты і афармляць некаторыя іншыя дакументы беларусам замежжа. Для атрымання, абмену або падаўжэння тэрміну дзеяння пашпарта давядзецца ехаць у Беларусь.
